Isa 1 | ZomZIV | STEP | Judah kumpi Uzziah, Jotham, Ahaz le Hezekiah-te hun sunga Judah le Jerusalem tawh kisai Amoz tapa Isaiah in a mangmuhna ahi hi.

Isaiah 1

1 Judah kumpi Uzziah, Jotham, Ahaz le Hezekiah-te hun sunga Judah le Jerusalem tawh kisai Amoz tapa Isaiah in a mangmuhna ahi hi.

A Lehdo Minam

2 Vante aw, za un! Leitung aw, ngai in! ^a
TOPA in gen khin zo hi.
“Tate ka khoi a, khang lian khin uh hi,
ahi hangin amaute in kei hong lehdo uh hi. ^b
3 Bawngtal in a pu thei hi,
laa in a neipa’ gan ankuang thei a ^c
ahi hangin Israel in thei loin
ka mite in a theitel kei uh hi. ^d
4 Ah! Amawhdim minam
khialhna netcip mite
a gilote suante ^e
siatna-a ka piaksa tate ahi uh hi. ^f
Amaute in TOPA taisan uh a; ^g
Israel Siangtho Pa simmawhin
amah nungngatsan uh hi. ^h
5 Bang hangin note hong kisat beh lailai ding ahi hiam? ⁱ
Bang hangin lehdo lailai na hi uh hiam? ^j
Na lutang buppi liam khin a,
na lungsim buppi gimlua khin hi.
6 Na khepek nuai-a kipan na sipzang dong
a damna mun om lo a -
liamna sidup le
meima naiphual bek omin ^k
kihah lo, kitun loin
sathau lah a kinuh kei hi. ^l
7 Na gam uh kilawi ta a,
na khuapite uh mei-in kihaltum hi.
Gamdang mite in na muhtang un
na gam uh hong sut uh a, ^m
khualmite in susia khin ta uh hi. ⁿ
8 Zion Tanu,
lenggui lo-a bukkhel bang,
tangmai huan a hampheng bang le ^o
a ki-umcih khuapi bangin kinusia ta hi.
9 Thahatpen TOPA in
eite tawmno khat hong sit lo hileh
Sodom tawh kibang khinin
Gomorrah tawh i kibang khin ding hi. ^p
10 Sodom gam-ukte aw,
TOPA kammal za un; ^q
Gomorrah mite aw,
i Pasian thukham ngai un!
11 TOPA in, “Tua zahta-a tam na biakpiakna uh -
kei adingin banga kimang ahi hiam?” ci hi.
“Tuutalte le ganhing vakthaute’ thaute tawh
meihal biaknate ka kham lua ta hi. ^r
Bawngtalte, tuunote le keelte sisan tawh
ka lungkim kei hi. ^s
12 Kei tawh kimu dinga nong pai ciangun
ka inntualte hih banga tuancil dingin
kua in hong sawl hiam?
13 A khiatna nei lo biaknate hong kengkeng nawn kei un! ^t
na gimnamtui uh ka kih hi. ^u
Kha det nite, Sabbath-te le kikhopna thupite - ^v
na gitloh kikhopnate uh ka thuakzo nawn kei hi.
14 Na Khadet pawite uh le na pawi tuamtuamte uh
ka hinna-in ka mudah hi. ^w
Tuate kei adingin vangik suak a; ^x
tuate pua-in ka gim hi.
15 Na khut uh zakin thu na nget uh ciangin
ka mai kong selsan hi; ^y
thu tampi na nget uh hangin
ka ngai tuan kei ding hi. ^z
Na khutte uh sisan tawh kidim hi;
16 sil unla no le no kisiangsak un! ^aa
Na gamtatsiate uh
ka muhna ah sem nawn kei un!
Na bawlbawl uh khialhnate tawpsan unla,
17 thumaan sin un! ^ab
Thutang zong un,
a kinengniamte ^{▼▼1.17 Ahikeh / a nuainette na tai uh a} hanthawn un.
Pa nei lote hu unla,
meigongte thu gensak un. ^ad
18 “Tu-in hong pai un, kikumkhawm dih ni,”
TOPA in ci hi. ^ae
“Na mawhnate uh ausan bangin a san hangin
vuk bangin a pak ding hi; ^af
kheisan bangin a san hangin
tuumul bangin ngo ding hi. ^ag
19 Note in utin thu na man uh leh
na gamsungua piang a hoih pen na ne ding uh a; ^ah
20 ahi hangin hong langpanga nong lehdo uh leh
namsau in hong nawmvalh ding hi,” ^ai

Ahang in, TOPA kam in a gensa ahi hi.
21 En dih un, bangci banga a muanhuaisa khuapi
numei kizuak suak zawzen ahi hiam! ^aj
Khatvei lai-in thutang tawh kidim hi;
ama sungah thumaanna teng a,
tu-in lah tualthatte bekbek teng ta! ^ak
22 Na ngunte sumngo-ek suaka,
na zucil pente tui kihelin peeng ta hi. ^al
23 Na gam-ukte a lehdote suakin
gutate tawh kipawl uh hi;
amaute in golhsum iplah uh a,
a mawk piak dingte nungzuih uh hi. ^am
Amaute in pa nei lote panpih lo uh a,
meigongte thu a sang kei uh hi. ^an
24 Tua ahi ciangin Topa, Thahatpen TOPA ,
Israel-te Thahatpen Pa in: ^ao
“Ah, ka galte panin ka honkhia dinga
kei mahmah in ka galte phu ka la ding hi. ^ap
25 Note langkhatah ka khut liik-in ^aq
na saam-ek teng uh ka siaksiang mang dinga,
na siantholohnate uh ka hemkhia mang ding hi. ^ar
26 Hunlui lai bangin na thukhente uh omsakin
na thudotte uh a tunglai ka bangsak ding hi.
Tua teng khit ciangin nang
Thumaanna Khuapi,
A Muanhuai Khuapi hong kici ding hi,” cikhia hi. ^as
27 Thutangin Zion kitankhia dinga,
ama sunga kisikkik mite thumaanin kitankhia ding uh hi. ^at
28 Ahi hangin a lehdote le mawh neite kisia khawm ding uh a,
TOPA a taisante a mangthang ding uh hi. ^au
29 “Nuam na sak mahmah uh tawsaw kung siangthote hangin
na maizum ding uh hi; ^av
na deihtel uh huante hangin
na zahlak ding uh hi. ^aw
30 Note tui a om lo huan bangin,
a tehpulhsa tawsaw na bang ding uh hi. ^ax
31 Mi thahatpa lee suak dinga
ama nasep mei-ek suakin
a nihin kangtum khawm dinga
tua mei kuamah in a phelh zo kei ding hi,” a ci hi. ^ay